പകിട്ടു പോയ
ചെങ്കോലും കിരീടവും
കൈവിട്ടു പോവാതിരിക്കാന്‍
പടയാളിയുടെ ചോര
പണയം പറഞ്ഞും
പകിട കളിക്കാന്‍
പ്രജാപതി
കളമൊരുക്കുന്നുണ്ട്
ഇളകാന്‍ തുടങ്ങിയ
ഇരിപ്പിടങ്ങളില്‍
ദേശഭക്തിയുടെ ലേബല്‍ പതിച്ച
ലാടതൈലം പൂശി
കരുത്തു കൂട്ടാമെന്ന്
പാണന്മാര്‍ പാടി നടക്കുന്നത്
പ്രജാപതിയും
മൂളിപ്പാടുന്നുണ്ട്
ഇരമ്പിത്തുടങ്ങിയ
ഇളം മനസ്സുകളെ
ഇരുട്ടില്‍ തളച്ചിടാന്‍
അതിര്‍ത്തിയിലൊരുക്കുന്ന
പകിട കളികള്‍ക്കാവുമെന്ന്
ആയുധപ്പുരയിലെ
കാവല്‍ക്കാരും കരാറുകാരും
കട്ടായം കുറുകുന്നുണ്ട്
നടുറോട്ടില്‍
ഉടഞ്ഞുപോയ മാനത്തെയും
വിശന്ന അടുക്കളയിലെ
ഒഴിഞ്ഞ കലങ്ങലെയും
ഓര്‍മകളില്‍ നിന്നകറ്റാന്‍
പകിട കളിയുടെ
പകിട്ടും പത്രാസും
പുരപ്പുറം കയറി കൂവാമെന്ന്
വിദൂഷകര്‍ വിളിച്ചു പറയുന്നുണ്ട്
-------------------------------------------------------------
വിതുമ്പുന്ന കുഞ്ഞുങ്ങളുടെ
തലച്ചോറില്‍ തീയിട്ട്
ബോധം കെടുത്തണമെന്ന്
'ബോസി'ന്റെ തിട്ടൂരമുണ്ട്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ