മനസ്സില്‍ നന്മ വിളയിച്ചാണ്
മരുഭൂമിയുടെ മടിത്തട്ടിലൊരു
'മദീന' പിറ കൊണ്ടത്‌
കദനം പുകയുന്ന കണ്ണുകള്‍ക്ക്‌
കുളിരുണര്‍ത്തി കനിവായി മദീന
കരിപുരണ്ട ഹൃദയങ്ങള്‍ക്ക്‌
കഴുകാന്‍ മഞ്ഞായി മദീന
കാപട്യം കെറുവുണര്‍ത്തിയ
കെട്ട ദര്‍ശനങ്ങളുടെ 'കെട്ട'കറ്റി
കരിഞ്ഞ 'ഇസ'ങ്ങളുടെ ചവര്‍പ്പകറ്റാന്‍
കേളി കേട്ട മധുരമായി മദീന
ഇരുളില്‍ വെളിച്ചം വിതച്ചും
ഇഷ്ടം വഴികളില്‍ പുതച്ചും
ഇമവെട്ടാതെ കരുണ യൊഴിച്ചുമാണ്
'ഇഷ്ഖി'ന്റെ ദൂദര്‍ മദീന കാത്തത്
തിരസ്കാരത്തിന്റെ നോവും
തിരിഞ്ഞു നോട്ടത്തിന്റെ നൊമ്പരവുമാണ്
തിരിച്ചറിവിന്റെ 'യസ്രിബി' ലെത്തിച്ചത്
തിളങ്ങും തിരുദൂദരുടെ വെളിച്ചമാണ്
തിരിച്ചറിയാത്ത വഴിയില്‍ 'മദീന' പണിതത്
മദീന ഒരു മോഹമാണ് -
മുത്തു നബിയെ കാതോര്‍ക്കുന്നവര്‍ക്ക്,
മദീന ഒരു മാര്‍ഗമാണ് -
മഹത്ത്വം മനസ്സാല്‍ തേടുന്നവര്‍ക്ക്,
മദീന ഒരു ലകഷ്യമാണ് -
മഞ്ഞും മധുരവും കൊതിക്കുന്നവര്‍ക്ക്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ