----------------
സം സം
കരുണയുടെ ഉറവയായത്
ഖലീലെന്ന വിളി കേട്ട്
വഴിയില്‍ വെളിച്ചം തേടി
തീര്‍ഥാടനം വഴിയാക്കിയ
ഇബ്റാഹീമിന്റെ മക്കള്‍ക്ക്‌ ...
സം സം
പ്രതീക്ഷയായത്
സഫയുടെ ചരുവിലും
മര്‍വ യുടെ മാറിലും
ചരിത്രത്തിന്റെ ഉറവ തീര്‍ത്ത
ജനതതി കളുടെ ഉമ്മ -
തളരാത്ത ഹാജറക്ക് ..........
സം സം
ഉത്തരമായത്
കാലിട്ടടിച്ച്‌ കരഞ്ഞ
വരണ്ടു പോയ
കുഞ്ഞു ചുണ്ടുകള്‍ക്ക് ,
പ്രതീക്ഷകള്‍ തളം തീര്‍ത്ത
നനവുണങ്ങാത്ത കണ്ണുകള്‍ക്ക്‌ ..........
സം സം
മോഹമായത്
വിളി കേട്ടവര്‍ക്ക് ,
കേള്‍ക്കാന്‍ കാതോര്‍ത്തവര്‍ക്ക് ,
നേര്‍ക്കാഴ്ച്ച മോഹിച്ച്
കണ്ണ് തുറന്ന് -
കാത്തിരിക്കുന്നവര്‍ക്ക് ..........
സം സം
ശമനമായത്
കരുണയുടെ പ്രതീക്ഷകള്‍
കെടാതെ കാത്തവര്‍ക്ക് ,
ഉറവയുടെ
വഴികള്‍ തേടി
ഓട്ടം ശീലമാക്കിയവര്‍ക്ക് ...........
സംസം
കരുത്തായത്
കനിവിന്റെ
ഉറവിടം കണ്ടവര്‍ക്ക് ,
ആര്‍ത്തിയുടെ പിന്‍ വിളിയെ
കല്ലെറിഞ്ഞോടിച്ച വര്‍ക്ക് ,
അഗ്നിയില്‍ കരിയാത്ത
ചിന്തകള്‍ കൂട്ടായവര്‍ക്ക് .......
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ