2011, ജനുവരി 15, ശനിയാഴ്‌ച

പെരുന്നാള്‍..

പെരുന്നാളിന്റെ ഓര്‍മ്മകള്‍ 
കയ്യിലിരുന്നു പൊട്ടിയ 
ഒരോലപ്പടക്കമാണിന്ന്‍ 
കസവുതട്ടത്തിന്റെ നിറവും 
കുഞ്ഞുടുപ്പിന്റെ തിളക്കവും 
ഓര്‍മയില്‍ 
ചിതലുതിന്ന ചിത്രങ്ങളാണ് 
മൈലാഞ്ചിയുടെ മണവും 
ഉരുകിയ വിളഞ്ഞിയുടെ ചൂടും
ഉമ്മൂമ്മയുടെ 
മങ്ങിയ ഓര്‍മകളിലെവിടെയോ 
ഒളിച്ചിരിപ്പുണ്ട് 
കുമ്പളങ്ങാ കറിയിലെ 
കടുകിന്റെ കുസൃതി 
കരിപിടിച്ച കലത്തില്‍ വേവിച്ച 
പോത്തിറച്ചിയോട് ചെര്‍ന്നിരിക്കുമ്പോള്‍ 
നാവിലോടുന്ന കപ്പല്‍ 
സ്നേഹത്തിന്റെ "ടൈറ്റാനിക്കാ"വുന്നു 
ഇപ്പോള്‍ 
അഴുക്കു പുരണ്ട ബ്ലാങ്കറ്റിനുള്ളില്‍ 
പെരുന്നാളിന്റെ വിശപ്പിനെ 
കെട്ടിപ്പിടിച്ചുറങ്ങുമ്പോള്‍ 
കുഞ്ഞുങ്ങളുടെ ചിരികള്‍ 
സ്വപ്നതിലെന്നെ തേടി വരുന്നു 
മിന്നുന്ന ഉടുപ്പുകള്‍ 
എന്റെ സ്വപ്നങ്ങള്‍ക്ക് സംതൃപ്തിയേകുന്നു
എവിടെയോ മറന്നു വെച്ച  കളിവീടുകള്‍ 
എന്നെ വിളിച്ചുണര്‍ത്താതിരിക്കാന്‍ 
എന്റെ സ്വപ്നങ്ങള്‍ക്ക് 
ദീര്‍ഘായുസ്സ്  ലഭിക്കാന്‍ 
ഞാനിപ്പോഴും 
പണിപ്പെട്ടുറങ്ങുകയാണ് ...............
എന്റെ സ്വപ്നങ്ങളെ 
തല്ലിയുണര്‍ത്താത്ത
ഏല്ലാവര്‍ക്കും 
എന്റെ ഈദ് ആശംസകള്‍